ދިވެހި ކަނޑުފަޅުތަކުން ދިވެހިރާއްޖެ ތަރައްޤީކޮށް ކުރިއެރުވޭނެއެވެ.

 ދުނިޔޭގެ ޗާޓުން ދިވެހިރާއްގެ ވިދަމުން ދަނީ ކުދިކުދި މުތީ ތަކެއް ފަދައިންނެވެ. މި ކުޑަކުޑަ ދިވެހިރާއްޖޭގެ 99 އިންސައްތައަށް ކަނޑު ވީއިރު ދެން އޮތް ބާކީބައި ނިސްބަތްވަނީ އަޅުގަނޑުމެން ދިރިއުޅެމުންދާ ފަސްގަނޑެވެ. ދިވަހިރާއްޖޭގެ ކަނޑުފަޅުތަކުން އެތަށް ރީތި މަންޒަރުތަކެއް ދައްކުވައިދެއެވެ. ދިވެހިރާއްޖޭގެ ކަނޑުފަޅުތަކުގެ ސަބަބުން ދިވެހިރާއްޖެ ތަރައްޤީވެ އެތައް ގިނަގުނަ ފާއިދާތަކެއް ލިބެއެވެ.
އިތުރައް ތަރައްޤީކުރުމަށާއި ކުރިއަރުވަން އެތައް ކަމެއް ކުރެވިދާނެއެވެ. އޭގެ ތެރޭގައި ދިވަހި ކަނޑުފަޅުތަކުން ބާނާމަސް " އެކްސްޕޯޓް " ކުރުމާއި، މާވަހަރާއި އިތާމުތް ފަދަ ތަކެތި ބޭރުޤައުމުތަކަށް ވިއްކުމާއި، ދިވެހި ކަނޑުފަޅުތައް އިޝްތިހާރުކުރުމާއި، އަދި މިނޫނަސް އެތައް ކަމެއް ކުރެވިދާނެއެވެ.

ކުރިޔާ އަޅާބަލާއިރު ރާއްޖޭގެ މަސްވެރިކަން މި ވަނީ އެތައް ގުނަޔަކަށް ކުރިއަރާފައެވެ. އެހެން ކަމުން ދުނިޔޭގެ އެހެން ޤައުމުތަކެކޭ އެއްފަދައިން ރާއްޖެވެސް މިވަނީ މަސްވެރިކަމުން  ކުރިހޯދާފައެވެ. މަސްވެރިކަމުން ރާއްޖެ ކުރިއަރަނީ ވަށައިގެން އޮންނަ ކަނޑުފަޅުތަކުގެ ސަބަބުންނެވެ. މަސްވެރިން ބާނާމަސް " އެކްސްޕޯޓް " ކުރުމުގެ އިތުރުން ރާއްޖޭގައި މަސް ދަޅުތައް ހަދާ ފެކްޓަރީތައް އިތުރު ކުރެވިދާނެއެވެ. މީގެ ސަބަބުން ރާއްޖެއަށް ވަންނަ ލާރި އިތުރުވެ ބޭރުޤައުމު ތަކުގައި ރާއްޖޭގެނަން މަޝްހޫރުވެގެން ދާނެއެވެ.

މަސް " އެކްސްޕޯޓު " ކުރުމުގެ އިތުރުން ދެން ކުރެވިދާނެ އަނެއް ކަމަކީ ކަނޑު އަޑީގައި " އަންޑަރ ވޯޓަރ ޓޭންކްތައް " އެޅުމެވެ. ރާއްޖޭގެ ކަނޑުއަޑީގައި އެތަށް ވައްތަރެއްގެ މަސްމަހާމެއްސާއި، މުރަކަޔާއި އަދި މިނޫނަސް އެތައް ރީތި މަންޒަރުތަކެއް ދައްކުވައިދެއެވެ. ކަނޑު އަޑިޔަށް ގޮސް މިމަންޒަރުތައް ބަލާލެވޭނަމަ އެތައް އެ ފުރުސަތުގެ ބޭނުން ހިފާނެއެވެ. ދުނިޔޭގެ ޤައުމުތަކަށް ބަލާއިރު މަދު ޤައުމެއްގައި މެނުވީ މި ކަހަލަ ޓޭންކްތަކެއް ނުހުރެއެވެ. އެހެންކަމުން ރާއްޖޭގައި މި ކަހަލަ ޓޭންކްތައް ހުރުމުން ރާއްޖެ އިތުރަށް ތަރައްޤީވެ ކުރި އަރައިގެން ދާނެއެވެ.

މާވަހަރާއި އިތާމުތް ފަދަ އަގުހުރި ތަކެތި ބޭރުޤައުމުތަކަށް ވިއްކުމަކީވެސް ދިވެހި ކަނޑުފަޅުތަކުގެ ސަބަބުން ރާއްޖެ ތަރައްޤީވެ ކުރިއަރައިގެން ދާނެ ކަމެކެވެ. މާވަހަރާއި އިތާމުތަކީ އެހާ ފަސޭހައިން ލީބޭ ތަކެއްޗެއް ނޫނެވެ. އަދި ބާޒާރުތަކުގައި އެތަކެތީކެ އަގު އެތައް ގުނަޔަކަށް އަރާފައިވާ ތަކެއްޗެވެ. ސެންޓު އުފެއްދުމަށާއި، ގަހާހެދުމަށް އެކިކަންކޮޅުތަކުގެ ވިޔަފާރި ވެރިން މިތަކެތި ބޮޑުއަގުގައި ގަނެއެވެ. ނާތީޖާއެއްގެ ގޮތުން މިތަކެތި ބޮޑުއަގުގައި ވިކި ރާއްޖެއަށް އެތައް ލާރިޔެއް އެތެރެވާނެއެވެ.

ދިވެހިރާއްޖެ ތަރައްޤީކޮށް ކުރިއެރުވުމަށް ދިވެހި ކަނޑުފަޅުތަކުގެ އިޝްތިހާރުވެސް ކުރެވިދާނެއެވެ. ރާއްޖޭގެ ޤުދުރަތީ ރީތިކަން އިޝްތިހާރުތަކުންނާއި ސައިޓުތަކުން ފެނުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވާނެއެވެ. މީގެ ސަބަބުން ގިނައަދަދެއްގެ ޒުވާނުންނަށް ވަޒީފާގެ ފުރުސަތު އިތުރުވެއެވެ. އަދި ފަތުރުވެރިކަމުގެ ދާއިރާއިން ރާއްޖެއަށް ލިބޭ ލާރި އިތުރުވާނެއެވެ.       

 ދިވެހިކަނޑުފަޅުތަކުން ރާއްޖެ ތަރައްޤީކޮށް ކުރިއެރުވުމަށްޓަކައި ބާނާމަސް "އެކްސްޕޯޓް" ކުރުމާއި، ދިވެހިކަނޑުފަޅުތައް އިޝްތިހާރުކުރުމާއި، މާވަހަރާއި އިތާމުތް ފަދަ ތަކެތި ބޭރުޤައުމުތަކަށް ވިއްކުމާއި، ކަނޑު އަޑީގައި " އަންޑަރ ވޯޓަރ ޓޭންކް " ތައް އެޅުމުގެ އިތުރުން އަދި އިތުރުން ކަންތައްތައްވެސް ކުރެވިދާނެއެވެ.